طبعا ماحقلكم الهرم الغذائي .. وقسمي صحنك والنص فيه سلاطه
و... و... مع إنو دا هو الصح
إنما حتكلم عن واقع وتجربه شخصيه ..
تحتاج منك صبر ووقت والنتيجه جسم صحي رشيق
طول عمرك بإذن الله
إنشاالله تكون سهله وتعجبكم ...
ثلاثيات
1 - بالنسبه للطبخ ..
حاولي يكون أكلك دايما خفيف يعني قللي دهون قد ماتقدري
والمقالي مرا في الأسبوع كفاااايه ...
حقدم إقتراحات للأكل الخفيف في آخر الموضوع
2 - اشتري كل منتجاتك قليلة الدسم ...وهيا أفضل من خالية الدسم
مشتقات الألبان ... المايونيز .. عجين البف باستري ...الخ
ومع الأيام حتتعودي وأهل بيتك على كدا
3 - السموم البيضا ...
سكر ... دقيق ... ملح
الملح <<< أساس البلا .. قللي قد ماتقدري
السكر ... ألغيه من حياتك نهائي
بدلي بالسكر الطبيعي وهنا نوعين
تروبيكانا وزيرو
عن نفسي أشوف زيرو أفضل بدون سعرات حراريه
تروبيكانا حلاه كثير
الدقيق ... حولي للبر والنخاله
وتشوفي كيف وسطك حيتنحت نحت
ثلاثيات
1 - صووومي من بعد الساعه 8 أو 9 بالكثير مساءا
لا تاكلي شي بتاتا البته ... <<< لا مو كثير
ولو سولت لك نفسك قليلها إنك صايمه وماتفطري إلا مع أذان الفجر
ومع الأيام حتلاقي نفسك ماحتجوعي إلا على الساعه 8 الصباح
2- المشي نص ساعه كل يوم >>> والله مو كثير
على صحتنا وسلامة العظام والقلب قبل الرشاقه والمظهر العام
أو مشي ساعه 3 مرات في الأسبوع
ولا تتنازلي عنها مهما كان يومك مشغول ..
3 - حاولي تنظمي وقت أكلك ...
يعني فنجان القهوه الساعه 6 صباحا ..
الفطور 8 الغدا 1 العشا 8 أو 9
مع الوقت حتلاقي نفسك ماتشتهي الأكل خارج الأوقات اللي تعودتي تاكلي فيها
ثلاثيات
1 - خففي أسبوع وأسبوع عادي ...
يعني أسبوع كلي فيه حلا أو مقليات ...
كلي طبخك العادي كبسه مكرونه إدامات معجنات
الأسبوع اللي بعدو خفيييف كأنك عامله رجيم ...
حقدم اقتراحات <<<
2 - المكملات الغذائيه لصحة شعرك وبشرتك وأضافرك
طبعا أغلب الأطباء ماينصحوا فيها على أساس إنها تلعب في هرمونات الجسم
ونظامه في حرق السعرات الحراريه وطبعا كل دكتور وقناعاته
وأنا بصراحه معاهم ماأحب المكملات والفيتامينات
إنما حقدم لك نوعين أنا أثق فيها لو حابه تجربيها
هير دال حتدعيلي لما تشوفي صحة شعرك بـــ 77 ريال تقريبا
سبلينا مشروب يخفف بالماء ((كلوروفيل)) مجرد حديد قد ماخففتي
في أكلك ماحتحسي بدوخه بإذن الله
3 - بذور الكتان
حافظي على ملعقه مطحونه في اليوم
صباحا مع كاسة عصير البرتقال أو مساءا مع كاسة لبن
بصرف النظر عن كل فوائدها ...
الكل حيسألك عن سبب نضارة بشرتك وصفائها
للحديث بقيه ....
ثلاثيات
1 - الخضار الورقيه ..
جرجير .. خس .. كزبره .. بقدونس
دخليها في كل أكلك حتى الساندوتش
وحقلك على طريقه عشان ماتكسلي
أول ماتشتري الخضار قطفيها وغسليها
لفيها في منشفه نظيفه خصصيها للخضار الورقيه
وحطيها في نشافة الملابس عشان تنشف
بعد كدا حطيها في كيس وأستعمليها في أي وقت ومع كل شي
2 - احتفظي دايما بتونا وكورن فلكس
عشان وقت الجوع ومافيك حيل تسوي شي
كلي تونا
وبعد المشي 5 ملاعق كورن فلكس لسلامة العضلات
3 - أخر نقطه ..
استعملي أواني صغيره صحن وملعقه وكاسه
الحكمه .. * كمية الأكل تقل ومعدتك تصغر
* تشبع عينك قبل بطنك لما يكون الصحن صغير ومليان بالأكل >> خدعه (:
اقتراحات لأكل خفيف ...
الفطور ...
ساندوتش .. 2 توست ولبنه أو بيضه مسلوقه ... مع شوية خضار ((اختياري))
مع كاسه عصير برتقال
فطور صحي وممتاز وقليل السعرات ..
ممكن حليب قليل الدسم .. ممكن ملعقة عسل
الغدا ..
كفته في الفرن مع 2 توست وخضار ..
صدر دجاج مشوي مع توست وخضار ..
شوربة خضار مع ملعقتين كويكر ...
وولو تضيفي لها القرع ... مممممم تجيب العافيه
خضار مسلوقه مع لحم لو تحبي .. طبعا بهريها بالطريقه اللي تحبيها
سمك مع خضار في الفرن ...
محشي خضار بس كلي الخضار بدون الإدام ..
العشا ...
ساندوتش .. بيض مسلوق أو مقلي
مع كزبره وبصل أخضر ((اختياري)) وشوية خضار
ساندوتش .. كفته مع خضار ..
سلطة لبن مع خيار و1 توست ...
أفضل عشا خصوصا لو كنتي مخبصه في النهار ...
اقتراحات في الأسبوع اللي حابه تخففي فيه ... وممكن تضيفي
نوع فاكهه لوحده وجبه في اليوم ...
طبعا الأكل منخفض السعرات ... وممكن تنزلي فيه 2 كيلو
خلاص خلصت
موضوع: @@ ( ثــــلاثياااااات .....رشاقتــك بـــدون دايـــت ) @@ 
